पुणे : बीव्हीजी इंडिया समूहाचे चेअरमन व व्यवस्थापकीय संचालक हणमंतराव गायकवाड यांना कृषी क्षेत्रातील नवसंकल्पनांबद्दल अमेरिकेतील मानाच्या ‘ॲग्री इनोव्हेशन’ पुरस्काराने गौरवण्यात आले. साउथ फ्लोरिडामधील टॅम्पा बे येथे विशेष समारंभात त्यांना हा पुरस्कार प्रदान करण्यात आला.
अमेरिकन असोसिएशन ऑफ फार्मर्स ऑफ इंडियन ओरिजिन (एएएफआयओ) या संस्थेतर्फे गायकवाड यांना हा पुरस्कार देण्यात आला. विषमुक्त शेतमालाचे उत्पादन दीडपट ते दुप्पट करून भारतीय शेतकऱ्यांच्या जीवनात आमूलाग्र बदल करण्यासाठी ‘बीव्हीजी’ने पाऊल उचलले असून, विषमुक्त शेतीसाठी नवसंकल्पनांच्या आधारावर अनेक उत्पादने बीव्हीजी लाईफ सायन्सेसने तयार केली आहेत. त्याचे आश्चर्यकारक सकारात्मक परिणाम दिसून येत आहेत. म्हणून गायकवाड यांना हा पुरस्कार प्रदान करण्यात आला.
या कार्यक्रमाला मराठी मंडळ टॅम्पा बेचे अध्यक्ष राहुल म्हसकर, साउथ फ्लोरिडा विद्यापीठाच्या नॅनो टेक्नॉलॉजी विभागाचे प्रमुख डॉ. यशवंत पाठक, सुधीर देशमुख, हेमंत दळवी, प्रदीप नाईकनवरे आदी मान्यवरांची उपस्थिती होती. उद्योजक बालाजी आगलावे यांच्या हस्ते गायकवाड यांना पुरस्कार प्रदान करण्यात आला.
‘भारतातील दहा कोटी लोकांच्या जीवनमानात सुधारणा करण्याचे उद्दिष्ट ठेवून ‘बीव्हीजी’ काम करत आहे. शेती आणि आरोग्य क्षेत्रात मोठी क्रांती होईल, असे संशोधन ‘बीव्हीजी’ने केले आहे. शेती उत्पादन दीडपट ते दोनपट करणारी उत्पादने आम्ही तयार केली केली असून, हजारो शेतकऱ्यांचे जीवन त्यामुळे बदलले आहे. त्यामुळे बीव्हीजी इंडिया ही केवळ कंपनी राहिली नसून, परिवर्तनाची चळवळ बनत आहे,’ असे प्रतिपादन गायकवाड यांनी केले